دور برد

صحيت اول امبارح حسيت بإحتقان فى الزور جامد .. وده غالبا ودائما بيكون مؤشر انى خدت دور برد، اليوم عدى عادى جدا فى الشغل وماكنتش تعبانة .. ابتدى التعب يبان عليا وتكسير الجسم والرشح ورجليا اللى مش شايلينى بالليل

زى كل يوم بنام جمب ماما عادى .. اليوم ده معرفتش .. لان ماما لازم تنام ومروحة السقف شغالة مما يؤدى الى عطس وتعب زيادة وانا مش قادرة ، ماما حست ان انا تعبانة وخافت لأعديها .. قولتلها الأمومية فى الزمخشرى بتقول انه فى مثل هذه الحالات الأم بتحضن طفلها وتطبطب عليه وتبوسه .. قعدت تضحك واديتنى برامول ودورت على فلوموكس مالقتهوش وحاولت تدينى مضاد حيوى غيره بس انا مرضتش .. وقالتلى قومى نامى فى أوضتك ، وقد كان .. ودى يا سادة يا كرام تبقى طردة رقم واحد

قمت نمت فى اوضتى وعلى سريرى وفين وفين لما النوم جه من التعب .. لاقيت اللى بيصحينى الساعة 2 بالليل ويقولى ماتناميش هنا !!!! …. مين؟ فين؟ ايه؟ ليه؟ .. طلع اخويا اللى بيصحينى وبيقولى ماتناميش هنا عشان حشغل المروحة وحشرب سجاير وحفتح الكمبيوتر !!!ه

قولتله حاضر .. ودى تبقى الطردة التانية .. قمت ادور على حتة تانية انام فيها وانا مش قادرة اقف اصلا لاقيت كنبة الصالون جمب باب الخروج ، المشكلة ان ماكانش عليها مخدة اسند راسى عليها .. المهم نمت وحسيت ببرد شديد اتارى المروحة بتاعة الصالة مفتوحة وعمالة اتأوه بالليل وبابا بيفتح الباب وداخل بعد ما صلى الفجر .. سألنى مالك يابنتى .. قولتله تعبانة شوية يا بابا

خلص اليوم ابو ليلة غريبة .. وبسبب طبع غريب فيا اسمه الالتزام رحت الشغل وانا تعبانة .. ماما اطمنت عليا الصبح وقالتلى اشترى فلوموكس وانا رايحة الشغل .. وقد كان بردو

رحت الشغل وكان باين عليا جدا التعب الشديد .. لا قادرة اتكلم ولا قادرة امشى وتعبانة اوى .. بس كل ده مامنعهومش انهم يتقلوا عليا فى الشغل .. لولا بس زميلتى عملت الجداول اللى طالبينها بدالى كنت طلعت روحى قدام الجهاز

روحت وانا بجرجر فى رجلى اتغديت وريحت شوية وتقريبا غفلت وصحيت لاقيت ماما خرجت وشوية وبابا كمان خرج ومابقاش فى حد فى البيت خالص غيرى .. حاسة انى سخنة اوى بس مش عارفة اعمل ايه .. كل اللى اعرفه انى استنى العشا تأدن وبعدين اخد فلوموكس وبرامول وانام .. سمعت المغرب وقمت من السرير بتأوهات شديدة وتحاملت على نفسى لحد ماوصلت للحمام واتوضيت وصليت وعملت كوباتين واحد لمون سخن والتانى جنزبيل بشاي اخضر وعسل نحل .. شربتهم وصليت العشا وخدت فلوموكس وبرامول ونمت

شئ طبيعى جدا وتفاصيل طبيعية ومنطقية ليوم واحد عيان وعنده برد الصيف اللى بيصفوه بإنه احد من السيف .. الشعور الغريب اللى جالى هو الغربة .. ايوة الغربة .. حسيت انى غريبة وان محدش يعرفنى خالص .. حسيت ان اللى حواليا ناس يمكن لأول مرة تشوفنى مع انهم اهلى وزمايلى .. يمكن مش غربة اوى بس حسيت بشعور غريب جدا والله .. خصوصا لما قعدت من الساعة 6 لـ 9 بعانى من الألم وقاعدة لوحدى مستنية العشاء .. حسيت بكل ثانية وكل لحظة فى التلات ساعات دول كأنهم تلات سنين مش تلات ساعات بس .. حسيت قد ايه البنى آدم ده ضعيف اوى .. قد ايه غلبان ووحيد مهما كترت الناس حواليه .. حيعملوله ايه الناس .. حيشفوه؟ .. لا .. الشافى هو الله

فى التلات ساعات دول حسيت انى ماليش حد بجد او جالى الإحساس ده عشان احس انه ماليش الا ربنا مهما عشت ومهما مرت عليا مواقف وتجارب وناس .. هو ربنا وبس .. ربنا اللى قادر يؤنس وحدتك .. ويفرج كربك .. ويكرمك

شعور غريب جالى لدرجة انى بقيت ادعى وانا بتألم واقول يارب حنن قلوب الناس عليا وحنن قلبى على الناس .. يمكن لو ده حصل حياتنا تبقى احسن ومش كل واحد يقول يلا نفسى وانا مالى .. طالما انا كويس مش مهم الباقى

سبحان الله لحظات الألم بالذات بتقربك اوى من ربنا .. لانك بتتيقين ساعتها ان محدش يقدر يعملك اى حاجة غيره هو وبس .. ساعتها بس بتعرف نفسك على حقيقتها وتعرف انت ايه وحجمك قد ايه بجد

المهم نمت وماحستش غير الساعة 10 بالليل بماما بتجسنى وبتقولى ياسمين مالك انتى مولعة نار وسخنة اوى .. ساعاتها بجد ماكنتش فاهمة حاجة .. واعية اه بس بقول اى كلام وبخطرف ههههههههههه .. شوفتونى وانا مخطرفة؟؟

كملت نوم ولاقيتها جابتلى فوارة برد خدتها وعملتى كمادات خلت الموزامبليه اللى فى شعرى يبوظ وخليتنى انام جمبها وطفت المروحة وفضلت طول الليل تجسنى وتشوفنى لسة سخنة ولا لأ

صحينا والحمد لله انا احسن دلوقتى واتصلتلى بالمكتب وقالتلهم انى مش حاجى النهاردة لانى سخنة وتعبانة

ربنا يكرمك يا ماما ومايحرمنيش منك ابدا يارب .. ويارب اشفى كل مريض وارحم الجميع وبلغنا رمضان واعيننا على صيامه وقيامه يارب .. اللهم آمين

26 Responses to “دور برد”

  1. كل سنه وانتى طيبه والف سلامه عليكى

  2. آمين يارباللهم آمين يارب العالمينعادي جدا يابنتي امال لو جيتي قضيتي يوم واحد هنا عندي في الهباب اللي اسمه الشغل واتعاملتي مع البعيد اللي مايتسمى اللي بيقلوله مازينجر دا (مانيجر)، اكيد حتحسي بقيمة النعمة اللي انتي فيها وان كل اللي بتقولي عليه دا مش تعب خااااااااااااااااااااااااااالصساعتها بس حتدوقي طعم الوجع والتعب والمرض والمعاناه بمعناهم الحقيقي

  3. فعلاً أحنا بنحس أوي بالغربة لما نكون ضعفاء.. احياناً بتوصل لغربة مع أنفسنا.. وما أقساه من شعوراسأل الله العظيم رب العرش العظيم أن يشفيكي.كلها ذنوب بتتساقط يا فندم:))طهور إن شاء الله.إيمان

  4. فعلا كل كلامك من اعراض البردخصوصا الشعور بالوحدةبس احب اضيف عليكى عرض بيجيلىو هو رعبى من الشيخوخة و خصوصا المصحوبة بامراض مزمنةلما بيجى للواحدبردالى بيصبرة انه عارف انها فترة مؤقتة و هيرجع ان شاء الله سليم يتنطط و يرى زى الاولانما بقى الامراض المزمنةفين الامل فيها طبعا الشفا بايد ربنا و الاعمارانما الفكرة هى الشعو بالوحده لما يلازمك مده طويلةممكن يعمل فى الواحد ايه؟؟؟يا رب ابعد عننا كل مرضو بالمناسبة انا عندى دور البرد ده زيك بالضبطو النهاردة بقيت كويسة الحمد لله

  5. حاجة غريبة ماتصورتش ان البوست ده ممكن يخليني اعيط ماعلينا .. الحمد لله انك بخير ..فعلا المرض حتى لو كان دور برد بيحسس الانسان بقد ايه هو ضعيف ومحتاج لربنا ربنا يخليلك والدتك ويعينك على برها وكل سنة وانتي طيبة

  6. سلامتك يا أنسانة ابقي طمنينا عليكي

  7. الف سلامة و يارب تكوني بخيرو كل سنة و انتي طيبة

  8. حبيبتى ياسمين كل سنه وانتى طيبه ومبروك رجوعك لمددونتك بلسلامه ياقمرازاى بس يجيلك احساس انك لوحدك وانتى عندك اهلك ربنا يخليهوملك ويخليكى ليهم بيخافو عليكى من النسمه وبيحبوكى الف سلامه ياقمر

  9. انا اول مرة اعلق فى مدونتك و مبسوطة انى اول واحدة اعلق على البوست ده بالذات و يا سبحان الله انا كمان تعبانة جدا بس مش برد حاجة اقوى بكتيربس الشىء المشترك فعلا الاحاسيس اللى انتى حسيتيها من دور البرد انا برده حستها بس من مرض اقوىو فعلا مالناش غير ربنا مهما كترت الناس حواليناو صدقينى حتى لو كان حد معاكى من 6 ل9 كنتى برده حسيتى الاحاسيس دى و كنتى حسيتى بالم برده و التعب بس الفكرة ان الونس ساعات بيخفف من وحشة المرض بس مفيش حد يقدر يكون عند حسن ظنك بيه 100% علطول لان الانسان طبيعته التقصير باراداته او حتى غصب عنه و ده اللى بيخلينا الحمد لله مالناش غير ربنا يبقى معانا دايما مهما نكون عموما مفيدة الاحاسيس اللى انتى حستيها وكويس انك اتعلمتيها بدرى , غيرك اتعلمها متأخر اوى و غيرك مبيتعلمهاش خالصو ياريت فعلا كلنا نحس بكده و نساعد بعضنا و نقف جنب الضعيف و المريض لان الايام حتدور و ممكن كل واحد يمر بنفس الظروف و الكلام ده بالذات ياريت الناس المتدينين يخلوا بالهم منه لان فى كتير منهم الحمد لله صائمين قائمين لكن واجباتهم تجاه الناس و زيارة المرسض و السؤال عنه والخ متلقهاش من اولوياتهم خالصعموما ربنا يا رب يشفيكى و يشفينى و يشفى كل مريض و اسأل الله لك العفو و العافية فى الدنيا و الاخرة و اللهم فرج كرب كل مكروب و اكشف هم كل مهموم و اشفى كل مريض و رمضان كريم

  10. الف سلامه عليكي يا سمسمهكل سنه وانتي طيبه

  11. ألف سلامة ربنا يشفيكي ويعافيكي أسأل الله العظيم رب العرش الكريم أن يشفيك ويعافيك وأن يبلغنا جميعا رمضان وينفعنا به .

  12. برد الصسف ده شئ سخيفكل سنه وانتي طيبه

  13. هى المشكله اننا لما بنكون ضعفاءبسبب المرض او بسبب أى مشكلهبنكون حساسين قوىوبنحس اللى حوالينا مش حاسين بيناوالحقيقه ان محدش بيحس بينا ولا بيرعانا إلا اللهوموضوع البرد ده عافك الله منه بترعب منه..علشان عندى ربووالعيا بالنسبه لى مشكله لانى مش هاقدر انام واستريحلانى لازم وانا زى الألف ..ملوش دعوة بالالتزام فى طبعىلانى لو عندى فرصه للزوغان هزوغ …هاعمل كل المفروض اعمله لان مفيش حد يعمله غيرى..ولانه لازم يتعملعلشان كدبتأزم لما بعياالحمل بيكون ثقيل قوىربنا يخلى لك ماما باباويهدى أخوك ويبطل سجاير هو كل اللى بيشربوا

  14. والله زيارتي للمدونة دياسعدتني جدا جدا جدااولا الف سلامة على حضرتكواطمئني كله فى ميزان حسناتك ان شاء اللهويا رب ربنا ينور قلبك بنوره ويكرمك ويرضى عنك ويدخلك الجنة فى عباده الصالحينوالله المستعان

  15. الف سلامة عليكي يا قمربعد الشر عنكيارب تكونى كويسه دلوقتىانا رجعت المدونة تانىيارب تكونوا فاكرنىيلا عايزة بقى معرفش امشي في المدونة من الزحمة

  16. الف مليون سلامةبس علشان تعرفى قيمة ماماكل سنة وانتى طيبة

  17. ألف سلامة .. شفاكي الله وعافاكيياريت ياإخواننا لما حد يمرض يبقى يقولي علشان يدعيلي كام دعوة أنا محتاجها لأن دعوة المريض مستجابة

  18. لا بأس طهور إن شاء اللهفعلا من عمق الأوجاع تتكشف لنا حكم وعظات وآه لو عرف الإنسان منا انه مهما تكاثر الناس حوله فإنهم لا يغنون عنه عشيئا من دون الله لما إغتر بهم ولا بجاهه ولا ماله ولا نفوذه لعل من دروس الحياة ان بين الوقت والأخر تومض الإشارات له على الطريق لعله يستكمل معانى الإفتقار إلى الله وحده وفى ذلك كمال الغنى ملحوظة علمية كصيدلى أنصح بعدم تعاطى مضاد حيوى فى حالات البرد لأنها عدوى فيروسية والمضاد الحيوى يتعامل مع العدوى البكتيرية فقط والمسألة فيها تفصيل ربما تناولته فى سلسلة مقالات لى على مدونتى ضمن ما أكتبه حاليا

  19. ألف سلامة عليكي يا بنوتةربنا يكرمك دايما بناس تاخد بالها منك وقت الفرح ووقت التعبكل سنة وانتي طيبة

  20. الف سلامة عليكى يارب ويارب تكونى بقيتى بخير اليومين دول كل ستة وانتى طيبه رمضان كريم عليكى وعلى الاسرة الكريمة

  21. السلام عليكم ورحمة الله وبركاته ………….الف سلامة عليكى كل سنة وانتى طيبة ورمضان كريم :)تحياتى

  22. الف سلامه يا سيدى حاول تبطل تشرب سجاير عشان غلط ع البرد لما يجيلك برد تانى متاخدشى اى مضادات حيويه جسم الانسان عباره عن مصنع ادويه سبحان الخالقف المره القادمه حاول انك تعرق وتعرق يعنى لو تقدر تجرى كام كيلو ابل متنام وتنام عرقان هاتصحى فايق ومروق وكل سنه وانت طيب

  23. السلام عليكم ورحمة الله وبركاته لا الف سلامة عليكي يا ياسو كل سنة وانت طيبه يا قمر رمضان كريم

  24. اللهم امينوالف سلامه عليكى انا بقى عندى برد بقاله اكتر من شهر ونص من ساعة المصيفتنصحينى بايهوعايز اقولك انتى رغايه اوى هههههههههه زيى !وكل سنه وانتى طيبه

  25. متزعليش هو طلاقة اللسان مش عيب اوى يعنى وكل سنه وانتى طيبه تانى

  26. السلام عليكم ورحمه الله ممكن كلامي يكون عن مدونه قديمة بس اللي شدني ليها ان فيها عبقرية في سرد القصة ليوم واحد علي فكرة انت ممكن تكوني في يوم من الايام بطله القصة القصيرة جربي وسدقيني عندك حس ابداعي جميل جدا وقوة في شد انتباه القارئ حتي نهاية القصة اشوف قصة كمان ممكن بس تكوني فيها بألف سلامه وصحة طول العمر

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: