ليلى الغضبانة

ايوة ليلى إنسانة

ايوة انسان اتولد بس لاقى نفسه ليلى

يعنى انتوا الاتنين إنسان

بس من نوع مختلف

*****

فكرة كلنا ليلى شدتنى اول ما دخلت عالم المدونات

وكان نفسى اكون معاهم فى الطلعات الجوية بتاعتهم

بس الحمد لله اخيرا جاتلى الفرصة انى اشارك

واسفة انى اتأخرت فى المشاركة

*****

مبدأيا .. ايوة انا ليلى

يعنى انثى

وبعيش فى مجتمع اخلاقه بدأت فى الإختفاء

إن ماكنتش اختفت واتاوت تحت التراب من زمان

اللبس بقا غريب وعجيب ومش طبيعى ابدا

يعنى يا بنت يا امورة يا عسولة ياللى لابسة اه

ومش لابسة اصلا

عايزة ايه ؟

نفسى اعرف انتى عايزة ايه بالظبط بلبسك المستفز ده

اه لو تعرفى بيتقال عليكى ايه

انا اهو بنت زيي زييك وعندى اخويا

وعارفة هو وكل اللى زيه شايفينك ازاى

وبيقولوا عليكى ايه

ايه لزمة الطرحة فوق شعرك وانتى جسمك كله باين اصلا

وليه يا ليلى يا محترمة يا اللى لابسة عباية حشمة جدا

تسيبى بنتك تمشى بالشكل ده

عايزة ايه انتى كمان؟

خلاص بقيتى مش عايزة تدخلى الجنة؟؟

بقا كل همك ان بنتك تبقى حلوة وامورة ومايفوتهاش قطر الجواز وخلاص؟؟

لا حول ولا قوة الا بالله

ويا بنوتة يا بتاعة الثانوى

ايه اللى بتلبسيه ده

عايزة ايه فى سنك ده

متخيلة ان الشاب الامور ده حيتجوزك؟؟

ولا ممكن يرتبط اصلا؟

بتحلمى

يا حبيبتى انا عارفة ان عندك مشاعر واحاسيس وحاسة بيكى

بس لسة بدرى

حافظى على نفسك عشان ربنا يكرمك باللى يحبك ويحافظ عليكى

يا حبيبة قلبى الاكل المكشوف الدبان كله بيحوم حواليه بجد

ليه تلعبى بمشاعرك واحاسيسك ونرجع فى الاخر نقول ياريت اللى جرى ما كان

وانتى اللى بتتعبى فى الاخر

على الاقل بتتوجعى وتتكسرى

وانتى غالية اوى عند ربنا ومش عايزك تتوجعى

سيبى كل اللى جواكى ده لحد ما يجى اوانه

عمرك شوفتى زرع مقطوف قبل اوانه طعمه حلو؟؟

بالعكس ده بيبقى اخضر وطعمه مر اوى اوى

بس لما بيجى اوانه ويستوى بيبقى عسل

وانا عايزاكى تبقى احلى كمان من العسل يا ليلى

*****

ايوة انا ليلى وبحقد على كل الرجال

ايوة من وانا صغيرة وانا بحقد عليهم جدا وبغبطهم بشكل مش طبيعى

وليه لأ يعنى

واحد واخد حريته

يروح ويجى زى ماهو عايز

يخرج وقت ماهو عايز

يسافر وقت ماهو عايز

يصاحب اللى يعجبه

يكلم اللى يعجبه

يلبس اللى يعجبه

ويا بختهم بجد بجد بجد

عشان مش بيتعاكسوا لما يمشوا فى الشارع

ولا لما يبقوا لابسين طقم شيك

او بيضحكوا

او بيبتسموا حتى

يا بخت كل راجل لانه ممكن لو جاتله الهفة

يجرى على شط البحر فارد درعاته تحت المطر

زى الطير الشارد

ومش خايف حد يتفرج عليه

ولا حد يبصله بصة وحشة او نواياها سيئة

ايوة انا بحقد على الرجالة كلهم

يا بختكم يا رجالة لانكم رجالة مش مصدر فتنة

غير ملفتين للنظر بأى حال من الأحوال

عمر حد فيكم شاف راجل ماشى من جمب قهوة

او جمب اى محل واقف على بابه اى حد تانى وقاله

بس بس

يا حلو انت ياحلو

يا عسسسسسسل

ايه الجمال ده

ايه الحلاوة دى

يا سسسسكككككككررررر

حصلت؟

ابدا

يبقى ليا حق احسدهم على حريتهم ولا لأ؟

ايوة انا عمرى ما كنت حرة

ولا عمرى حسيت بالحرية

اول ما اخرج من باب بيتنا بحس انى مسجونة بنظرات كل الناس

خصوصا الرجال

ورغم ان لبسى محتشم

ورغم انى محجبة الحمد لله من زمان

ورغم ان جمالى عادى جدا جدا جدا جدا جدا

الحمد لله على كل حال

ورغم انى ممكن ابقى ماشية بسبح

او مكشرة وباين عليا الارهاق

فى اى حال كنتى يا ليلى حتتعاكسى يعنى حتتعاكسى

ومش عايزة حد يقولى اصل فى صعوبة فى الزواج

والمشاكل الاقتصادية وبتاع

اتقوا الله بجد

لما يبقى واحد متجوز ومخلف وبيتحرش

لما يبقى واحد عجوز وبيعاكس

دول بردو عندهم مشاكل فى الزواج؟؟؟

ولا هيا حيوانية وبهيمية وخلاص

وليه ما نفرقش بين الناس

ليه اى حاجة مؤنثة تتعاكس

اوقات احس انهم لو جابولهم معزة حيعاكسوها ويتحرشوا بيها

انا معاكم ان فى بنات بتزودها كتييييييييير اوى

واللبس بقا زبالة بجد

عارفة وشايفة والله

بس بردو مع ذلك فى بنات منقبات

ومخمرات ولابسين اسدال وعبايات وواسع

نفسى اعرف واحدة زى دى تتعاكس لييييييييييه

ليه بجد؟

لما هيا احترمت حالتك الاقتصادية

ومارضيتش تفتنك

واتقت الله فيك

ليه انت كمان ما تتقيش الله فيها؟

وتعاملها زى ما بتحب الناس تعامل اختك؟

وعلى كل حال

اى حد بيعاكس يتأكد ان اخته هيا كمان حتتعاكس

وان ماكنش له اخوات حتبقى مراته

او بنته

او اى حد عزيز عليه

يا جماعة انا واحدة بجد قربت اكره الرجالة والله

بس لولا انه حرام مش بعمل كدة

ويمكن انتوا لمستوا بنفسكم احساسى من خلال موضوع

فوبيا الزواج اللى كتبته السنة اللى فاتت

ايوة انا اختكوا واتأذيت بسببكوا

وطبعا مش بعمم

بس اتأذيت فى حياتى وبقيت مش عارفة حتى ارتبط بحد

لانى بقيت اخاف من الكل

عاطل على باطل

بخاف وخلاص

لا مش خوف ده رعب وبجد

الحمد لله على كل حال

يا معشر الرجال

خليكوا كويسين عشان ربنا يكرمكم بالله عليكم

واتقوا الله فى النساء

اللى حتقفوا قدامه يوم القيامة

ويحاسبكم على كل بنت عاكستوها

او اتحرشتوا بيها

هى دى وصية سيدنا محمد ليكوا؟؟


اتقوا الله فى النساء؟

اخى الكريم بالله عليك اتقى الله فى اختك

وفى بنتك

وفى امك

وفى زوجتك

كفى المرء إثماً أن يضيع من يعول
ويا معشر الليلالت

اى النساء

اتقوا الله بجد

فى لبسكم

ومشيتكم

وصوتكم

وطريقتكم

واسلوبكم

انا واحدة زيي زيكم وكان نفسى ابقى حرة

بس مش عارفة

مش عشان ماينفعش

بالعكس .. ما اكثر المتحررات

عشان انا اللى حاطة القيود دى لنفسى

وربنا اللى حيعوضنى عن الحرية الممكنة اللى سبتها من اجله

ويمكن مع شدة قيودى الدينية والاخلاقية

وجدت قمة حريتى بجد

14 Responses to “ليلى الغضبانة”

  1. :)كلام جميل وصح جدا يا عزيزتىربنا يهدى الجميع

  2. بورك قلمك وبنانك

  3. بعيدا عن البوست ياانسانه واظن ان اسمك ياسمينبس ليه انتى مش بتردى عن اللى بيقرالك ويحب انه يشاركك وبيكتبلك كومنت كأنك بالظبط حد بيكلمك وانتى مش بتردى عليهدا اسمه تجاهل ولا ليه معنى تانى عندك رغم انى اظن انك مش مشغوله للدرجه لانك اهو بتدخلى وبتنزلى بوستس احنا طبعا اخوات بس حبيت استفسر منك عن النقطه دى

  4. والله عندك حق ف كل اللي قولتيه لازم كلنا نتقي الله فيما نفعل

  5. الانصاف شئ رائعالنظر للمشكله من كل اتجاه اصح طريق للعلاجبس هى ازمة اخلاق ااقصد كارثة اخلاقلازم نربى ليلى علشان ليلى هى اللى بتربى ادممهى ليلى ام ادم واخته وبنتهبس ليلى هى السبب

  6. الحرية فى جوهرها الالتزاموالالتزام ..يحررك من عبودية نفسك ..فتصبحى حرة بحق ……بارك الله فى عقلك يا انسانة كلمة حق ..جعلها الله فى ميزانك

  7. يالهوي ياياسمين بجدبصراحه ماكنتش ناويه اعلق دلوقتي وانا في الشغل وقلت اما اروح بس لما نزلت اجيب حاجه من تحت دلوقتي قلت لازم اطلع اكتب اللي شفته سمعته.. بنت طالبه ماتتعداش ابتدائي مثلا او اولى اعدادي بالكتير اوي ماشيه بلبس المدرسه هي ومامتها وعمالهل تحكيلهل تقريبا على حسب ما سمعت وفهمت عن حد ضايقها او حاجه زي كده ومامتها بتقولها “انتي امشي محترمه وخلاص مالكيش دعوه بحد سيبي اللي يتكلم يتكلم” تخيلي واحده في السن دا وبردو ماتعتقتشولا يمكن الموضوع حاجه تانيه وانا اللي فهمته كده لاني لسه قاريه البوست بتاعك وترجمته على هذا الاساسياريت يبقى كده بجد لانه لو ماكانش كده وكان زي مافهمته تبقى مصيبه سودا بجدربنا يسترها علينا ويعافينا ويعفو عنا ويهدي ويصلح الحال يارب

  8. ما شاء الله الموضوع جميل جدا بس أحب أقولك إن الوضع بقى فعلا سىء للغاية وأحب أقولك إن حاليا فى بعض البنات اللى هما مش ليلى هما اللى بقوا يعاكسوا الشباب والله ومش عارف أين ذهب الحياء

  9. 10 على 10تعرفي المشكله من وجهة نظري بتكون في المجاهرة بالذنبيعني بعتبر المعاكسه دي مجاهره بالذنبفيشوفه واحد نفسه ضعيفة فيقول الناس كلها كدهفيعاكس وهكذا دواليكوالمحترمة انتي بتقولي بتتعاكس بس لازم تفضل محترمة واللي بيعاكس ده حيجيله يوم وشوفت بعيني واحد بيعاكس واحده يطلع ابوها كان مستخبي مش عارف فين وياخد التهزيقة التمام وبيحطوا نفسهم في مواقف باييييخة ده غير انهم اصلا بيعملوا غلطبس تعرفي انا مش بعاكس على خط مستقيمبس ساعات بيبقا فيه لبس مستفز بيخليني ابص لصحابي واقوم قايل بصوت عالي حراااام ارحمووووونابجد قولي لليلي ارحمونا شوية برضه :Dتحياتي على الموضوع

  10. بارك الله لكى وبارك لكى فى افكارك وعقليتك وهداكى الى الطريق المستقيم بجد مش عارف اقول ايه بس الموضوع مهم ومش نسكت عليه مين السبب البنات ولا الولاد دى مش القضيه لكن المشكله الحقيقيه هى مشكله مجتمع كامل.. مشكله ثقافه مجتمع غير قابل للتحضر…. مشكله شباب عاطل …مشكله انحدار اخلاقى ودينى عند الشباب والبنات على حد سواء… مين قال ان المرأة مش واخدة حريتها او ان المرأة مش حرة بالعكس احنا كمجتمع مش عارفين نحققلها حريتها ونديها حقها اللى ربنا شرعه ليها ؛ فلو كل فرد اتقى ربنا فى بيته واولادة وزوجته و اتمسك بدينه واخلاقه وقيمه اللى اتربى عليها هيكون فيه عدل وانصاف فى المجتمع قال رسول الله صلى الله عليه وسلم ” كلكم راع وكلكم مسئول عن رعيته، فالإمام راع ومسئول عن رعيته، والرجل راع في أهل بيته ومسئول عن رعتيه، والمرأة راعية في بيت زوجها ومسئولة عن رعيتها، والخادم راع في مال سيده ومسئول عن رعيته، وكلكم راع ومسئول عن رعيته ” صدق رسول الله صلى الله عليه وسلم تحياتى على البوست الجرئ والجميل دة

  11. اول مرة ادخل المدونه وبجد عجبنى اوى اسلوبك وطريقتك فى الكتابه وفقك الله وهداكى الى طريق الحق المستقيم واذهب عنك كيد الشياطين تحياتى

  12. والله عندك حقانا فعلا قربت اجنين من الناس ديه اصلاانا ليلي و انا فعلا فعلا فعلا غضبانة جدا

  13. السلام عليكم ورحمة الله وبركاته اولا بحييكى على موضوعك الى لم كل الاطراف الرجال والنساء ووضع الحقوق والواجبات على الاثنين ونفى المبررات الكاذبة التى توضع امام الرجال لمعاكسة النساء ونفى ايضا المبررات الكاذبه التى تأخذها النساء حجه لحريتهم جزاكى الله كل خير اتقوا الله فى النساء هكذا امرنا رسول الله يارب كل الى يقرأ الموضوع دا يكون جرس انذار له اتقى الله فى امك فى زوجتك فى اختك فى ابنتك يكرمك الله فيهم ان اتقيت بنات ونساء الناس دومتى طيبه والسلام عليكم ورحمة الله وبركاته

  14. بصى ياإنسانةبالنسبه للجزء الاول من كلامك عن ليلى كرمز للأنثى وعلاقتها بالمجتمع بما فيه من عادات و أفراد رجال كانو أو نساء عارف التحرش و جلب التحرش و الاستعداد للتحرش وتتقبل التحرش مصدره ايه؟سببه ايه؟سببه هوا نفس السبب اللى بيخلى البنات السعوديات اللى بيتصورو و هما بيمارسو الجنس عشان ينزلوه ع النت وجسمهم عريان تماماً لكن لابسي برقع على وشهم طبعاص مش برقع الحيفهمتينىبالنسبه للجزء التانى من كلامك الجاله مش مرتاحين قوى كدة يا عزيزتى الرجاله بيموتو فى البح و العبارات و القطارات و طوابير العيش أيضاًالجهل لما يعم يا انسانة مبيفرقش بين راجل و ست أبداًد|علىsafenatno7.wordpress.com

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: