الإعلام الأوفر

امبارح اليوم كان عادى وزى اى يوم بس الغريب انى لاقيت مدونات بتقول ان حفيد الرئيس مات .. بصراحة مصدقتش برغم انها حاطة لينكات للخبر من البى بى سى نفسها إلا انى بردو ماصدقتش

فى الموقف ده افتكرت حوار مسرحية الزعيم لعادل إمام لما قالوله: الرئيس مات .. رد قال: ريس مين اللى مات .. هو الريس بيموت زيينا كدة؟؟؟

فعلا حسيت ان الناس من كتر ما الراجل قعد وخلل ومش بيموت وكل سنة يعملوله عيد ميلاد ويغيظونا – وكأنه حمادة عزو بتاع مصر– وهو زى ماهو ما شاء الله عليه أسد .. ابويا اصغر منه بـ20 سنة بس لو وقفتهم جمب بعض تقول ان ابويا عنده 100 مش 60 ، وان حسنى كبيره 60 مش 80 .. فعلا الشعور ده اترسخ فى عقول واذهان كل المصريين وعشان كدة امبارح معظم ردود الافعال كنت بحسها مصدومة ومذهولة .. إيه ده .. هما بيموتوا زيينا؟؟؟؟؟؟؟؟؟؟؟؟

معقولة هما بشر زيينا أصلا؟؟؟

دول بياكلوا احسن اكل وبيشربوا احسن شرب وبيتعلموا احسن تعليم وبيتعالجوا احسن علاج والشوارع بتتقفلهم عشان يمشوا بعربياتهم الفاخرة براحتهم وعمرهم ما عانوا من الزحمة زيينا ولا خدوا ضربة شمس او بكوا فى المواصلات من الاحساس بالقهر- زى ماكنت بعمل طول سنوات الدراسة – ولا عمرهم راحوا مدارس زحمة والمواد الدراسية اللى فيها مالهاش معنى .. ولا عمرهم اتخرجوا ودوروا على شغل ودابت كعوبهم فى اللف على وظيفة بأى مرتب بس اهو يبقى اسمهم بيشتغلوا وخلاص

ولا عمرهم فكروا التفكيير العادى بتاعنا ده: نتجوز ازاى بالمرتب وبالوضع ده .. ولا عمر حد فيهم سافر برا يشتغل اى حاجة عشان يعرف يأمن مستقبله عشان يقدر يعيش ويبقى بنى آدم .. ولا عمر واحد فيهم اتقدم لواحدة واترفض عشان مش قد المقام او مستواه المادى مش مناسب

اللى حصل امبارح انه ايوة هما بشر زيينا وبيموتوا ويمكن ده كان سبب الصدمة الكبرى للشعب كله ، انا نفسى لما شوفت الجنازة امبارح ولما شوفت الخشبة بجد انهرت من البكاء لإن كل العز ده وكل السلطة دى ذابت تماما امام الله .. كلنا واحد ونهايتنا واحدة

مش الحزن اللى ضايقنى اللى ضايقنى هو رد الفعل – المبالغ فيه – من كل القنوات المصرية والبرامج المصرية وكأنهم بيقولوا للأسرة المالكة: احنا اهو بنوجب معاكوا ماتنسوناش بقا ، رد فعل الإعلام بجد فكرنى بالجرسون اللى مستنى التبس والبقشيش وكل شوية يقولك: كل سنة وانت طيب

الليل جه وضاع منى معاد الطبعة الاولى بس اكتشفت ان النهاردة مافيش طبعة اولى ولا اخيرة حتى .. مالقيتش ولا برنامج مصرى توك شو شغال إلا البيت بيتك .. قمت جايبة البطيخة من التلاجة وقطعتها وهاتك يا فرجة

لاقيت المفتى بيبكى وبيأكد ان محمد علاء فى الجنة حتى ماقلش (نحسبه كذلك) لأ هو فى الجنة .. حتى ماقلش (إن شاء الله) .. لالا يا جماعة هو فى الجنة .. حتى ماقلش (ندعوا الله) .. يا جدعان لأ هو فى الجنة المفتى بيقول كدة

وقال حديث كدة مش فاكرة نصه بصراحة بس تقريبا مضمونه عن الصبى المتوفى وكدة .. قال ان المعنى اللى فى الحديث ده انا شوفته بعينى فى وفاة محمد علاء .. ساعتها كل اللب اللى فى البطيخة وقف فى زورى .. يعنى يا سيدنا الشيخ حضرتك بكل علمك الوفير ده وكل سنوات عمرك اللى قضيتها فى الدراسة بين فقه وسيرة وتفسيرة واحاديث عمرك ماشوفت المعنى ده الا فى وفاة محمد علاء بس؟؟؟؟

واللى ضايقنى اكتر ان الكلام كان بس عن محمد علاء .. كان ممكن جدا ماحدش يضايق من السادة المتفرجيين لو عممنا الكلام اكتر عن اى طفل او صبى توفى .. ساعتها كنا حنحس ان احنا واحد بجد .. مش مصر فى ثانية تحولت للرئيس مبارك واولاد الرئيس مبارك واحفاد الرئيس مبارك

او حتى – وده احتمال بعيد خالص – اننا ندى للموضوع حجمه الطبيعى ونتكلم عن كل مواضيعنا اليومية العادية ومن ضمنها الموضوع ده .. اومال بس فالحين كل يوم حوادث تسد النفس وانفلوانزا الخنازير والطيور وحاجة تخض .. مرة واحدة كل ده بخ راح؟؟؟ .. كل المصايب توقفت عشان الحفيد مات؟؟؟

امبارح بردو جبنا عمرو أديب فى القاهرة اليوم ولاقينا البرنامج كله بيتكلم عن هذا الموضوع الجلل .. وحسيت بكم النفاق لما واحد اتصل وبيبكى على ابنه اللى توفى فى حادثة من سنة تقريبا – ربنا يرحمه ويصبر أهله – بس مالوش غير طلب واحد انه يطمن على الرئيس عامل ايه؟!!!ه

الأحلى بقا الريبورتاج اللى جه فى القاهرة اليوم امبارح عن ردود فعل الشارع المصرى على الخبر ده .. بجد بلا مبالغة معظم الناس كانت بتقول بخبث مصرى أصيل : إنا لله وإنا اليه راجعون .. ربنا يرحمه ويرحمنا يارب .. والأحلى كمان لما عمرو بيقوله هو وحمدى استريح بقا ياريس .. انت تعبت عشانا كتير استريح عشان اسرتك بقا وامريكا مش حتطير يعنى .. حسيت انى قدام حلقة قرع رسمى

انا مابقولش مايزعلوش عشان هما فى السلطة بالعكس دول بشر وليهم حق الحزن والعذاء وربنا يصبرهم … الفكرة كلها اللى مش قادرة افهمها وبحاول ادورلها على سناريو تفسيرى: ليه رد الفعل العنيف والشديد ده خصوصا من الإعلام .. يكونش مثلا احنا خلاص بقينا ملكية مش جمهورية والصبى اللى توفى كان حيورث الحكم عشان كدة الإعلام عمل الضجة دى؟

وعلى اى حال انا من موقعى هذا بتقدم بواجب العزاء للسيد الرئيس وحرمه والاستاذ علاء وحرمه والاستاذ جمال وحرمه وربنا يصبركم ويصبر كل اللى زييكم ويخرجنا من الدنيا دى على خير



28 Responses to “الإعلام الأوفر”

  1. أنا لا أدري لماذا تفاجأ الناس بالنفاق الحكومي مرورا بالجنازة المهيبة والحداد الإعلامي؟ ما المفاجأة في ذلك؟ ففي كل الدول ذات النظام الشمولي تؤله الحكومة النظام الحاكم ليل نهار .. بوجه حق أحيانا وبدون وجه حق غالبا .. فمابالكم إذا تدخل القدر وأتى إليهم بحدث كهذا؟ وأيضا لماذا تفاجأ الناس بنفاق الإعلام المملوك للقطاع الخاص؟ هل يخفى على أحد أن هناك تداخلا كبيرا بين رجال الأعمال وبين النظام الحاكم؟ أليس منهم من هو عضو في الحكومة؟

  2. انا عاجبنى اوى البوست بتاعك وبجد انتى قلتى اللى جوايا وخصوصا لما قلتى :لاقيت المفتى بيبكى وبيأكد ان محمد علاء فى الجنة حتى ماقلش (نحسبه كذلك) لأ هو فى الجنة .. حتى ماقلش (إن شاء الله) .. لالا يا جماعة هو فى الجنة .. مفتى الديار بيقول كدةوكمان الحتة بتاعة :واللى ضايقنى اكتر ان الكلام كان بس عن محمد علاء .. كان ممكن جدا ماحدش يضايق من السادة المتفرجيين لو عممنا الكلام اكتر عن اى طفل او صبى توفى .. ساعتها كنا حنحس ان احنا واحد بجد .. مش مصر فى ثانية تحولت للرئيس مبارك واولاد الرئيس مبارك واحفاد الرئيس مباركبجد انت قلتى اللى فى نفسى كلهعفارم عليكى يا انسانة

  3. قد اتفق معاكي ياياسمين في بعض النقاط ولكن اسمحي لي اختلف معاكي في الكثير منهااولا احنا ليه رابطين بين الموضوع من الناحيه الانسانيه والناحيه السياسيهليه رابطين بين الرئيس حسني مبارك والانسان حسني مباركليه رابطين بين العيلة اللي ربها رئيس الجمهورية والعيلة المصرية اللي فقدت ابنهاليه رابطين بين مبارك الرئيس ومبارك الجد اللي فقد حفيدهعماله اقرا في كلام على الفيس بوك وبعده عندك هنا كله استغراب من حالة الحزن وفيه رائحة شماتة والعياذ باللهانا واحده من الناس اللي زعلت اوي لما عرفت الخبر زي بالضبط ما زعلت قبلها بيوم واحد على وفاة والد واحده اعرفهاوزي ما كنا في حزن ووجع على اطفال غزه وضحاياها وضحايا الدويقه وضحايا العبارهاللي توفي ده بني آدم، طفل واهله دول بشر جده ده إنسان زيي وزيك وزي اي حد ممكن يتعرض لنفس المصاب لا قدر اللهليه التفكير الانساني اتلغى تماما ومش بقينا نفكر غير باسلوب “يستاهل اللي يجراله” و”يمكن يتعظ” و”انتوا نسيته اللي عامله” وكأن الشماته دي هي الامر الطبيعي في مثل هذا الظرف وما سواها من حزن وتعاطف ما هو الا رياء ونفاق طب واحده زيي وواحده زي خالتو امبارح وهي مش قادره تمسك نفسها من البكاء على منظر والده “علاء” وهو في الجنازه، حينافقوا ليه ولا ايه مصلحتهم اللي مستنينها من ورا حاجه زي دياللي عايزه اقوله، والكلام لكل مستغرب من الحاله دي او بيشمت والعياذ بالله او حتى لسان حاله “يمكن يتعظ” وان كان قصده خير ونيته سليمه في ان الرئيس يتعظ وياخد باله من الشعب اكتر من كده شويه و و، عايزه اقول اولا ان لكل مقام مقالمش وقته خالص وهو لسه ابنهم مدفون مش بقاله ساعات معدوده ثانيا اتقوا الله ياللي بتشمتوا وياللي عاملين فيها واعظين وبتقولوا يلا يمكن يتعظ ويتقي الله ويراعي ربنا فينا اتقوا الله ياللي بتشمتوا في الموت وافتكروا اللحظه اللي ممكن تبقوا فيها في نفس الموقف لا قدر الله وشوفوا هل في لحظتها الكده والمصاب لسه واقع حتتقبلوا ولا تستحملوا كلمه من حد ينصح ولا يعظلا إله إلا الله ولا حول ولا قوة إلا باللهإنا لله وإنا إليه راجعون اللهم اؤجرهم في مصيبتهم واخلف لهم خيرًا منها

  4. تحياتى على البوست الجميل لاكن مش كل الناس منافقين توجد ايضاً ناس قلوبهم خليه من النفاق .

  5. يبقى انت اكيد اكيد في مصر انا برده افتكرت نفس الموقف من مسرحية الزعيم بس انا علقت بعديها قولت حاجة واحدة يا ريته يتعظ ان الموت قريب اوي مننا فيخاف ربنا فاخر ايامه ويحسن المعيشة ويحاول يصلحها ويبقى كده تمام وربنا يحسن ختامنا بس هنعمل ايهافلا يعقلون

  6. بصى انا زعلت علشان نفس ماتت علشان اب وام قلبهم هيتحرق على ابنهم ابن مين جدو مين ميهمنيش وبكرة النفاق اللي بيحصل في القنوات

  7. الحمد لله انك متفقه معايا يا سمسمهقمة النفاق بصراحه بس انا لاحظت انهم فتحوا التليفزيون النهارده

  8. انا لله وانا اليه راجعونربنا يرحمه ويصبر اهلهحزينه

  9. إنا لله وإنا اليه راجعونربنا يرحم الطفل ويصبر امه وابوهأما بقى النفاق اللي شفناه فده للأسف اللي مضيع حسني مبارك،قعدوا معتمين على الخبر وبعد الدنيا كلها مانشرته حاولوا يعالجوا الأمر فزادو الطين بله

  10. بسم اللهاوافقك الرأي ان الأمر مبالغ فيه بشكل لا يطاقربنا يصبرنا احنا على مصابنا

  11. البوست جميل واتفق معك فيه كله الا فى العنوانانا مش قادر افهم ايه علاقة (مبارك الرجل والانسان والمسيرة) بالكلام اللى مكتوبوعلى فكرة تعليقاً على الناس اللى فاكرة انهم مبيموتوش زينانفكرهم بكلام المولى عز وجل وهو يقول لاشرف الخلق محمد صلى الله عليه وسلم(وما جعلنا لبشر من قبلك الخلد افإن مت افهم الخالدون )دمت بخير اكرر اعجابى الشديييييييييييييييد بالبوست

  12. طفل يموت يخلع قلبى زيه زى ابن البواب اللى خطفوه وسرقوا اعضاؤه ورموهزيه زى الالطفال اللى غرقوا فى العبارهوالاطفال اللى اتحرقوا فى القطار بتاع الصعيدعندى وعندك وعند الناس اللى عارفه ان ربنا فوق الكلام المنافقين بيتعملوا مع وفاة الطفل على انه شئ غير عادىرغم قبلها بيومين طفلين ماتوا فجأة بدون سببوقبلها طفلين اندبحوانتعاطف مع كل الآباء ولا يفرق معانا ابن رئيس أو ابن غفيرلكن ما يفعله الاعلام شئ قبيححقا قبيحوعمرو أدين كشف نفسه بشكل سافررحم الله الطفل وصبر ابوه وأمه وابو وام أى طفل رحل عناوعافانا الله من النفاق والمنافقينالكل يموتوالموت نفسه يموت

  13. مات حفيد الرئيس فاصاب الناس بزهول و حزن للكثيرين منهم لانهم توقعوا موت الرئيس و تمنوه في نفوسهم الا انه لم يكون هو المتوفي و لا ابنه الذي يجهز نفسه للحكم بل حفيده و ليس ابنا للابن المكرود جمال بل ابن من لا شان له بالتوريث فحزن الناس علي انفسهم و امانيهم التي انعكست تماما اكثر مما توقعواها

  14. وامبارح الناس كانت بتتفرج على متش الاهلىيارب ميكنش شكلنا كان بايخوانهاردة الناس كانت بتكلم عن هشام طلعت مصطفىيارب منكنش اتكشفنااصل احنا كدة وهانفضل كدةودة حال الدنيا فهى ليست دار بقاءوحشتينى اوى يا انسانةتحياتى

  15. لا وايه بقى ، حديقة على مساحة عشر آلاف متر اسمها حديقة الطفل محمد علاء مبارك ، الحديقة دي بقى فيها الف شجرة ، وكمان حتبقى اسرع حديقة اتعملت في مصر لأن العمل بدا فيها يوم الأربع وحينتهي الحد اللي جاي ، حالة نفاق جماعي فظيييييعة

  16. فيه مبالغة فى الموضوع ده ؟أيوة فعلاً ما انكرشفيه نفاق شديد حصل ؟أيوة حصل ما انكرشلكن ليه يا جماعة الشماتة دى كلها من كل الناس ؟ هو الولد ده ذنبه إيهانا سمعت ناس بتدعى عليه و بتقول أحسن فلا ستين داهية و ده ذنب إللى غرقوا فى العبارة و إللى اتهتك عرضهم فى أمن الدولة وووويا جماعة الولد ده ذنبه إيه و لا عمل إيه ؟ إدعوله ربنا يرحمه

  17. انا متفق تماما مع الباشمهندس احمد القاضيبس انا بردو اتغاظت جدااا لما لقيت حمدي رزق اللي كان مع عمرو أديب ف الحلقة بيقول ـ الريس طول عمره باصص للغلابة ـ دمي اتحرق——-مبروك الشكل الجديد الرائع للمدونة يا ياسمين

  18. مدونتك أكثر من رائعة.. تسلم إيدك

  19. معاكي ان كده عيب جداتحياتيادم

  20. فعلاتصدقي انا اول ما عرفت الخبر .. حسيت انهارسالة من ربنا للريس والعائلة الملكية انه لا جاه ولا ملك ولا اموال يمكن ان توقف مصير حدده الله سبحانه وتعالىونفس الرسالة دي للشعب عشان يفوق بقى ويخلي عنده دم ويعرف ان مفيش حد اكبر من ربناوالموضوع كشف برضوا ان قد ايه في مصر منافقين كتييييررررر قوي

  21. .طبعا ده تمييز مبالغ فيه الموضوع قلب ملكيه فعلا و اصلا كل البرامج الي ناقشت الموضوع ياما جابت في سيره اطفال ماتوا و زعلنا عليهم و طبعا حفيد الريس له مقامه بس كات كفايه ياخد حتي اهتمام يعادل اي شخص مشهور بيتوفي في البلد فنان ولا لاعب مثلامش استفزاز وخلاص الشعب كله بيسال هو الريس بيمووت? وده سؤال مطروح من زماندي مش شماته ده حق كل واحد فينا انه يحلل و يقيم شخصيه المفروض بتقودنا و محدش لا جرح ولا شمت ولوو اصلا هما يعني هتفرق معاهمانا بضم صوتي لكل من قالياكش يتعظتحياتي

  22. سعداءبالمرور على مودونتك المتميزه وندعوك للأشتراك فى برنامجنا الأذاعى من الأذاعه الرئيسيه لمصر اى أذاعة البرنامج العام ويذاع يومياالتاسعه وعشر دقائق صباحا عدا الجمعه.سنشير الى مدونتك فى البرنامج اذا لم يكن لديك مانعوننتظر تعليقاتك على ما نطرحه من اسئله وموضوعات فى مدونتنا وهذه التعليقات تذاع ايضا مع الموضوعات المعلق عليهاوبالمدونه يمكن الأستماع الى حلقات سابقه من البرنامج عن مدونات اخرى نختارها لتميزها.وبموقعنا تفاصيل اكثرالمدونهhttp://netonradio.blogspot.comالموقعhttp://stop.to/cairoوبالموقع رابط تحت الساعه الى اليسار ليدخلك الى مجموعتنا على الفيسبوك واسمها انا والنت حيث يحكى الزملاء فى المجموعه حكاياتهم مع النت وندعوك للأنضمام اليهتحاتنا وامنياتنا لك بالتوفيق

  23. اولا ومع احترامى لرايك طبعا هوه المفتى مكانش بيقول على محمد مبارح انه داخل الجنه بلطجه او عشانه حفيد الرئيسلا هوه كان بيقول انه داخل الجنه عشانه صبي ولسه مابلغش يعنى معندوش اى ذنوب يتحاسب عليها يعنى ملاك من ملايكه الجنه والله اعلموبعدين هوه كان بيقول المعلومه على محمد علاء اه بس تفتكري كان بيقولها عشان محمد علاء بس؟لا طبعا ده كان بيقولها معلومه عامه ومحمد علاء كان مثال بسمش عشان احنا النظام بتاعنا وبتاع الحكم بتاعنا وحش هنشكك كمان في الديناتمنى زياره مدونتى المتواضعهوسعيده بالتعليق عندك

  24. امال فين كاميكاز؟؟؟؟؟؟؟

  25. شارك معنا باختيار القصيدة او الخاطرة الافضلعادل فاروقصورة في بروازhttp://sabaharabi.blogspot.com/2009/06/blog-post_3522.htmlعبد الله العباسيألم بلا أملhttp://sabaharabi.blogspot.com/2009/06/blog-post_9605.htmlد/ ايمان مكاويابحث عنكhttp://sabaharabi.blogspot.com/2009/06/blog-post_158.htmlايهاب سيدخائنhttp://sabaharabi.blogspot.com/2009/06/blog-post_6557.htmlحليس حورية نصيرةذكرينيhttp://sabaharabi.blogspot.com/2009/06/blog-post_5130.htmlانتصار طايلاتوكأ بعصا الحبhttp://sabaharabi.blogspot.com/2009/06/blog-post_6044.htmlاسلام محمودبتنساني وبتسبنيhttp://sabaharabi.blogspot.com/2009/06/blog-post_5269.htmlاسراء حامدلخبطةhttp://sabaharabi.blogspot.com/2009/06/blog-post_7682.htmlمصطفى محمودعرفتِ اليوم آياتيhttp://sabaharabi.blogspot.com/2009/06/blog-post_9758.htmlsky angle اترك لي هذا المكانhttp://sabaharabi.blogspot.com/2009/06/blog-post_13.html………………………………………………………………………………ولو عاوز تشارك في مسابقتنا الادبية كل اللى عليك أنك تشترك في الجروب وتتفاعل معناجروب جريدة الصباح العربي على الفيس بوكhttp://www.facebook.com/groups/edit.php?success=1&customize&gid=78080770039#/group.php?gid=78080770039تحياتي وتمنياتي للجميع بالتوفيق

  26. بس ازاي كل ده ممكن يحصلهي دي المشكلهتمنيت اني اعيش علي نفس المنواللكن ازاييبدو انه مينفعش

  27. انتهينا من اختيار الفائزين في مجالي الشعر والقصة القصيرة وذلك لعددنا الأول ولكن مازلنا نرحب بكل الأعمال لأن المسابقة دورية , من يريد أن تصل أعماله من مدّونته الى جمهور القراء فى مصر والوطن العربي , ارسل لنا أعمالك من قصة وشعر وخواطر الى البريد الألكتروني التاليarabicsabah@yahoo.comكما نرحب بمقالاتكم التي ستنشر فور ارسالها على جروب الجريدة وستصبح مفتوحة لمناقشتها بين القراء … تابعونا على جروب الجريدةhttp://www.facebook.com/group.php?gid=78080770039انتظرونا قريباً في الاسواقتحياتيالصباح العربي

  28. مرحبابعد عمل تقييم من قبل تدوينة دوت كوم لجميع المدونات المصرية نبلغك بأن بعد اضافة مدونتك إلى تدوينة دوت كوم قام العديد من القراء بالاطلاع على مدونتك الشيقة والجميله المليئة بالخواطر لذا ترجو منك اسرة تدوينة دوت كوم بمراسلتنا للأهمية على Tadwina@gmail.comحتي نتمكن من ارسال البانر الخاص بنا لوضعه على الصفحة الرئيسية حتى يتمكن العديد من القراء في مصر والدول العربية بالاطلاع على مدوناتك المستحدثةيمكنك متابعة مدونتك على الرابط التالى:http://www.tadwina.com/feed/151مع خالص الشكرفريق عمل تدوينة دوت كومwww.tadwina.com

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: