عفواً .. انا غير متضامنة

طبعا معظمنا سمع عن قضية هبة نجيب ياإما من الفيس بوك او حتى من مواقع او مدونات تانية كتير وحتى لو مكنتش سمعت ممكن تعرف عن الموضوع أكتر من هنا


بصراحة انا مش فاهمة او يمكن كل حاجة واضحة والعيب فى قدراتى الذهنية اللى بقت فى النازل اليومين دول ، انا لما قريت كل اللى اتكتب حاولت أحط صوباعى على المشكلة مالقتش مشكلة اصلا عشان افكر فيها ، كل الحكاية ان البنت عايزة تسيب السعودية وعايزة ترجع مصر لوحدها ووالدها معترض .. مشكلة عائلية بحتة بس بما انها بقت علانية والكل بيدلوا بدلوه فمعلش حقول رأيي واستحملونى


انا شايفة ان اعتراض والدها ده شئ طبيعى جدا حتى لو كانت فى مصر بردو حيعترض ، يعنى الفكرة مش فى كون الاسرة فى السعودية او مصر الفكرة فى كونها اسرة عربية بتخاف على أبنائها ، وبيزيد إستغرابى لان اصلا خوف الأهل علينا ده شئ كويس مش وحش وعمرى ما اتضايقت منه بالعكس ، كنت كل ما اقرا فى جريدة او اشوف فى التليفزيون جريمة بشعة من اغتصاب وسرقة وقتل وبلاوي زرقا كنت اخاف انا على نفسى اكتر واقدر اوى اللى يخاف عليا


كنا مع الموضوع ده او ضده انا شايفة ان فى ناس كتير اوى بتحاول تخلى القضية نسائية زيادة عن اللزوم ، وحجتكم ان كل ده بيحصلها عشان هي بنت إنما لو كانت ولد كان حيقف قدام ابوه ويرفض طلبه ويعارضه ويروح مطرح ماهو عاوز … انا بسأل هل حتى الولد اللى يعمل كدة يبقى صح؟ .. ماهو كمان غلط ويبقى ابن عاق وحرام عليه اللى بيعمله


ومش معنى ان الولد بيغلط او مجتماعتنا سامحة للولاد بالغلط فى القدرة على الوقوف فى وجه الأهل وعصيان أوامرهم يبقى نطالب للبنت بالمثل ، وللعلم حاليا ومع الجرائم اللى كترت أوى بقت الاهالى تخاف على الولد زى البنت واحيانا الولد أكتر


ليه كل حاجة نلزقها فى أنثى ضايع حقوقها فقط لكونها أنثى؟؟؟ … كأننا على راسنا بطحة واى حد يجي جمب اى أنثى تبقى مصيبة سودا على راسه


انا شايفة ان عمر مافى حاجة بتحصل بالعافية خصوصا مع الأهل لأن فى ايديهم باب الجنة أساسا وطاعتهم فرض وربنا قرنها بعدم الإشراك بيه .. المفروض ان العلاقة تتصلح بين البنت ووالدها ونسعى اننا نصلحها ومافيش حل غير كدة بدل ما نمشى ورا دماغنا ونسافر بلد أهلها نفسهم واللى طول عمرهم فيها ومخرجوش منها أبدا مش عارفين يتعاملوا او يتعايشوا فيها فمابالكم بأى حد جاى من بلد غريبة وطباعها مختلفة وكل حاجة فيها مختلفة عن هنا


ولو انى حاسة بردو ان فى حاجة مش واضحة .. يعنى هل للبنت قرايب هنا فى مصر حتقعد عندهم ولا هى عايزة تسافر وخلاص حتى لو حتقعد لوحدها .. وطبعا احنا عارفين اننا بنتكلم عن مصر مش انجلترا … مصر اللى لو واحدة بس قاعدة بطولها هيا وعيالها ومطلقة او أرملة مش بتخلص من كلام الناس … فمابالكم بآنسة


انا مش عايزة نجرى ورا العواطف وتاخدنا الهمة ونعمل منشتات كبيرة وإعلانات فى مدوناتنا انا اتضامن مع هبة نجيب .. انا شايفة ان اللى عايز يفيد البنت دى فعلا يكلمها بالعقل ويحاول يفهمها انها ممكن تندم بعد كدة لما تلاقى نفسها بطولها ومحتاجة لأهلها .. وكلنا أصلا محتاجين لبعضينا فمحدش يقولى مش حتحتاجهم … حتى فى ابسط الأمور لو اتجوزت ولا حاجة حتحتاج أهلها يكونوا معاها


لازم نبص لقدام ويبقى عندنا بعد نظر … خطوة السفر دى صح ولا غلط ونتيجتها ايه فى المستقبل


ده غير ان فى نقطة محيرانى الصراحة .. دلوقتى البنت بتقول ان اسبابها فى طلب السفر هو مش لمجرد السفر وإنما للبعد عن هذه الأسرة بإعتقادتها وأساليبها الدينية الخانقة بالنسبة لها ، طب إفرض ان البنت دى عايشة هيا واسرتها فى مصر ومافيش السعودية دى خالص كان حيبقى ايه الحل؟ … هل حنطالب ساعتها انها تسيبهم وتسافر اى بلد تانية ولا تستقل عنهم وتعيش فى شقة لوحدها؟

وكمان مش عايزين ننسى ان فى بنات كتييييييييييييييييييييير اوى فى مصر بيعانوا من اللى بتعانى منه هبة ده … وبردو مش عايزين ننسى ان البنت والولد كمان حاليا بيعانوا يمكن من حاجات أكبر من الأسرة نفسها زى البطالة والفقر والعنوسة وحاجات كتيرة أوى ، يعنى الكل مخنوق ولو عايزين ننقذ حد من الخنقة كنا أنقذنا نفسنا الأول

ولأنى عارفة مصر واللى فى مصر فأنا مستغربة بصراحة هذه الرغبة القوية لهبة فى العودة الى مصر ، يمكن اللى مقلل إستغرابى شوية انها ماقعدتش فيها كتير وكانت زيارتها ليها قليلة أوى .. لأنها لو كانت طولت كانت حتعرف قد ايه فى جرائم من قتل وسرقة وإغتصاب وخلافه وقد ايه في فقر وبطالة وارتفاع أسعار وأزمة مواصلات وتلوث وأمراض واللى كان آخرها التيفود والمحاصيل الزراعية المروية بمياه الصرف الصحى … ده اللى قاعد فى مصر نفسه يطفش وينفد بجلده من المصايب المتلتلة اللى نازلة على دماغ أهلها من كل مكان

فجأة بقت مصر جميلة ونظيفة وحلوة … ده لدرجة ان الناس نفسهم يرجعوا لحضنها تانى .. حضنها اللى تعبنا من كتر الشوك اللى فيه ، والموضوع كبر وخد أكبر من حجمه وكل اللى فى مصر حسوا انهم فعلا فى بستان آخر الزمان اللى مليان مانجة ورمان واللى بيساندوا ياعينى اختهم اللى قاعدة بعيد عن البستان ومش لاقية لا مانجة ولا رمان

ألا هو الرمان بقا بكام دلوقتى؟

الحقيقة انا شايفة انها تستهدى بالله وتتقرب من ربنا وتصلى وتدعى ربنا يعينها ويقويها وتصبر وتحتسب وتسمع كلام أبوها وتحاول تصلح العلاقة اللى بينهم وفى الأول وفى الآخر دول أبوها وأمها وأكيد بيحبوها وعايزينلها الخير وأكيد ربنا حيعوضها خير إن شاء الله فمن ترك شيئاً لله عوضه خيراً منه ، وحيلف الزمن ومشكلتها حتتحل وهى نفسها لما تبقى أم عمرها ما حترضى ان الوضع بينها وبين ولادها يوصل للمرحلة دى ولا إن ولادها ” ولد أو بنت ” يوقفوها الموقف ده فى يوم من الأيام

وانا عن نفسى حدعيلك ربنا يهديلك نفسك ويهديكى للى فيه الخير والصواب فى دنيتك وآخرتك اللهم آمين

  
تحديث
بعد تبنى «المصرى اليوم» قضيتها.. هبة نجيب المحتجزة فى السعودية تتوصل لتسوية عائلية
وتنهال التهانى من كل صوب لتهنى هبة لأنها وقفت أمام القهر والظلم وإستطاعت ان تأخد حريتها بعد 3 سنوات من العناء ، طب معلش احنا عندنا مشكلة بسيطة كدة اننا بنفكر وعندنا دماغ والمأساة الأكبر ان لينا رأى وده بيضايق الكثير بس معلش 
 
 
عايزة أعرف بس منين متشدد ومنين سمح بعمل تسوية عائلية تسمح للبنت بالسفر دون تدخل أطراف خارجية؟

وازاى نوصفه بالتشدد أصلا دون ان نسمع وجهة نظره؟؟ وكمان ازاى يبقى متشدد بعد ما عرفنا انه اقتنع هو والأسرة بإن إستمرار هبة فى السعودية يضر بها نفسياً ؟؟

السؤال دلوقتى بقا … هل الأب ده فعلا متزمت ومتشدد ولا كلنا ظلمناه وتحاملنا عليه وأولنا بنته نفسها؟؟؟

 
وبعدين إزاى نص الخبر بيقول ان الأب والأسرة إقتنعوا بكدة بدون تدخل أى أطراف خارجية وإزاى تطلعلنا المصرى اليوم وتقول ان بعد ما الجريدة اتبنت قضيتها أخيرا عرفت تحصل على تسوية عائلية وان البنت بتشكر الجريدة على إهتمامهم بقضيتها 
 
طب معلش يعنى البنت حلتها لوحدها أهو فى الآخر .. من غير لا سفارة ولا حقوق إنسان ولا وزارة خارجية ولا فيس بوك ولا مدونات ولا حاجة أبدا … طب ليه مانعملش كدة من الأول بدل مانشهر بإسم الأب فى كل حتة وسيرتنا وسيرة حاجة أسرية تبقى على كل لسان وفى الجرايد والجروبات والمدونات؟ 
 
هبة أعذرينى انا مش قادرة أهنيكى وأقف فى طابور المهنئين الطويل اللى شغال تهانى وناقص يزغرطوا ويطرقعولهم صندوق ساقع على النصرة القوية دى … يمكن مش قادرة أعمل كدة لانى كنت فى يوم من الأيام زيك وفاكرة انى لو بعدت حبقى أحسن وحبقى مبسوطة .. وسبحان الله فعلا بعدت وبقيت فى بلد غير البلد خالص … بس ساعتها بجد ماكنتش مبسوطة ولا حاجة ولا عمرى عرفت آخد فرحتى كاملة وأهلى كلهم بعيد عنى ولا عمرى قدرت أنسى اللى ربوا وكبروا وصبروا وصرفوا وعلموا وعملوا كل حاجة علشانى .. ودلوقتى بتمنى أشوفهم ولو حتى فى صور او اسمع صوتهم ونصيحتهم فى اى حاجة فى حياتى 
 
كانت أمى وأبويا دايما يقولوهالى زمان … عمر ماحد فى الدنيا دى يقدر يحبك زى أمك وأبوكى … احنا حبنا ليكى خالص ونقى ومن غير اى طلبات او شروط .. إحنا بنحبك وبس 
 
أتمنى تراجعى نفسك وحتى تمشى وهما راضيين عليكى وماتنسيش تقبلى إيدهم قبل ما تسافرى   

24 Responses to “عفواً .. انا غير متضامنة”

  1. وانا كمان غير متضامنهمش بالعه موضوع ان واحده عاوزه تسيب بيت اهلها وتعيش في بلد بعيد عنهمواساسا الاسلوب العدائي اللي استخدمته ضد عائلتها والتشهير باسم والدها علي المدونات والفيس بوكوفي الاخر يقولولي حريه؟؟اي حريه دي اللي يخلي بنت مهما كان عمرها تسيب بيت اهلها لمجرد انها عاوزه تيجي مصر اللي هي معاشتش فيها اكتر من ست سنين؟وطالبه من الناس يؤيدوها من غير سببسؤال بس؟؟لما انتي عاوز تأييد الناس ليه مش بتقولي للناس السبب؟ولا الناس دول قطيع تعالوا أيدوني هييجوا يأيدوكيأسفه مش هقدر اتضامن مع هبه لان منطقها غير مفهوم بالمره واسلوبها مع اهلها غير مشجع بالمره ان الواحد يتضامن معاهامش عارفه ازاي الناس اللي متضامنين معاها بيأيدوها ياريت يحطوا نفسهم مكانهاممكن يكسروا قلب اهلهم بالشكل ده ؟ممكن يتمردوا علي اهلهم بالشكل ده؟طيب بلاش لو ان ليهم اولاد عاوزين يسيبوهم ويعيشوا بعيد عنهم هيكون رد فعلهم ايه؟

  2. بجد انا مستغربة القصة دي جدامش عارفة اتخيل انها تكون قاعدة في نفس البيت مع اهلها و قاعدة في اوضة لوحدها عمالة تكتب على النت و تتكلم في التليفزيون للبرامج و تقولهم اللي بيحصل و اد ايه هيا عاوزة تمشى و تسيب اهلها!هوا احنا – كشعب- وصلنا للدرجة بقينا ننسى اهمية المشاعر و اهمية الاهل و العيلةولا هيا فعلأً المشاكل في حياتها مع اهلها كبيرة لدرجة انها عاوزة تطفش و تمشى و مش فارق معاها حتى السمعة اللي هيا عملاها لأهلها!ربنا يهديها و يهدلها الحالتسلم ايدك يا انسانة🙂

  3. شوفي اللينك ده الأولhttp://justice4every1.blogspot.com/2009/08/blog-post.htmlلست رجل دين ولا أنا متفقه فيه .. لكنني متابع لبعض الأمور المنطقية التي بدأ رجال الدين في نقاشها وفقا لظروف عصرنا .. ومنها موضوع كموضوع هذا البوست .. فهل في هذا العصر مازال من حق الأب أن يمنع ابنته من حرية التحرك وأن يطغى عليها هكذا في عمرها هذا ثم نقول أن عليها طاعته سواء كان طاغية أم لا؟—سأضرب لك مثالاموضوع سفر المرأة بدون محرم هو أمر يبحث حاليا من جدبد .. فقد كان ذلك في عصور يمكن فيها أن يختلي الرجل بالمرأة الأجنبية أثناء السفر .. أما في عصرنا الحالي ونحن نسافر على الطائرات مثلا .. لا نخشى على النساء من ذلك .. وقد قمت بالحج من الكويت منذ عامين وكان معنا في الفوج فتيات ونسوة بدون محرم .. وكانوا في العشرينيات والثلاثينيات من عمرهنالموضوع برمته يحتاج الى تجديد للفكر وفق متطلبات العصر حضرت نقاشات عده حول جواز السعي بين الصفا والمروة في الطابق العلوي .. وكذلك السعي في المسعى الجديد الموازي للقديم .. وكذلك جسر الجمرات المكون من 4 طوابق الآن .. وكذلك جواز اخراج زكاة الفطر كأموال وليس حبوب .. وكلها أمور تختاج الى اعمال المنطق وفق متطلبات العصر الحديث .. لكن العقول تأبى الا وأن تتمسك بالثوابت القديمة

  4. انوس انا مختلف معاكي في الامر رايي حتشوفيه عندي في المدونةمودتي

  5. السلام عليكمحقيقي الموضوع انا قجرا تابعته من اول يوم وصدمني الموضوع كله لما دخلت اناقش هبة واللي كانوا بيساندوها وكأني بقول عجب والهجوم كان بالبداية في اليوم الاول بشع وواحد منهم كان عنيف لدرجة فضل يستنجد بامريكا والكنيسة المصرية والفاتيكان واسرائيل شعرت بغصة شديدة ووجهت لها الكلام ووضحت لها اني ام قلت يمكن اقدر افهمها احساس الاب ايه وفعلا انا ام لبنات من نفس الجيل تقريبا لكن هجومها كان مؤلم جدا عليا باحساس ام بتتهان امال الاب المسكين ايه شعوره كان وبنته عاملة ده كله ياربي ده ابتلاء للاب ربنا ياجره ويصبره مش البنت اللي صدمتني قد الدفاع المستميت عن شئ واحد حريتها امام تسلط الاب على كلام اللي كانوا بيقولوه حاسة من وقتها بصمة لتغير قيمنا والرجال فين بجد في الدم الحامي اللي كان لو جارته حد عاكسها يقوم يهد الدنيا قد كده كل القيم اختلت قولولي انتم ياشباب اليوم يابنات اليوم مالكم ومال اجيالكم انا زيك حبيبتي خرجت مصدومة وماقدرتش اتصور الخلل اللي في المجتمع ولا اقدر اتضامن معاها كنت فين البر باب تعب وربى وبعدين لما الابن يكبر او البنت يقوله خلاص حياتك مش عاجباني والاب ممكن يكون محتاج لحنية بنته فين الحنية منين القسوة دي فين ربنا وهل فجاة بقى عادي البنت تلم شنطتها وتسيب اهلها وتسافر ياتفضح ابوها وتشتكيه على الملأسبحان الله ولاحول ولاقوة إلا بالله تحياتي لكٍ وسلامي ماجدة الصاوي

  6. كمان يا جماعه مش معقول واحده ابوها متشدد كده وقاسي عليها وهندها حريه في استخدام الانترنتانا كل ما افتح الفيس بوك الاقيها موجوده علي شات الفيس بوككمان حريتها في التدوينوكمان حريه خروجها من البيت براحتها اللقاء اللي اجرته هبه مع الصحفيه نورا يونس كان خارج البيت كان في سيبريبقي هبه عندها كل الحريه بس والدها خايف عليها من السفر العيش لوحدهاوكمان هي قالت بنفسها انه مش بيضربهاو بتخرج وتدخل براحتها وعايشه براحتها يبقي ومفيش اي ضرر جسدي وكمان اللي فهمته ان هي اللي مقاطعه والدها والدتها من سنتينفي انسان عاقل يقاطع ابوه وامه اللي عايش معاهم في نفس البيت لمده عامين؟؟مش قادره اتخيل ده بصراحه وخاصه انه مفيش سبب واضح لكل اللي بتعمله وتقولهوكمان حملتها منظمه جدا بالظبط من 1/8 وهي ابتدت في حملتها علي مدونتها وعلي الفيس بوك

  7. اتفق معك تماما في وجهة نظركالموضوع عائلي بحت ولا يجب منها التشهير به علي النتوموقف المصري اليوم موقف دعائي حلمنتيشي بحت

  8. اهنيكي جدا جدا على تفهك للقضيهديه بجد وعلى ادراكك ليهالان انا كمان كنت من المعارضيين بشده لسفر هبه وبعدها عن اهلهايا جماعه كل واحد مننا يحط نفسه مكان ابوها او اخوهاومش هاقول انه يكون بالسعوديه وبنته او اخته هتنزل مصر تعيش لوحدهالاهاقول ان بنتك او اختك معالك بنفس البيت طلبت منك انها هتعيش لوحدها ولو بالشارع اللي وراكمهل هتوافقعايز بس رد ويكون صادق فعلا مش عايز كلام انشى وحقوق المرأه والكلام دهلاوم نحط نفسنا مكان الاب ده او الام هل يتركوا بنتهم تعيش لوحدها بمصر وهما بالسعوديههل ده يعقليا ريت كل واحد يجاوبني بصراحه

  9. يا جماعة هل نسيتوا قضية هبة ونادين وكيف تم قتلهم بوحشية فقد كانت نادين تعيش لوحدها وأهلها بالسعوديةفهل أخطأ والدها أنه خايف عليهاعموما هتشوفوا ربنا هيعمل فيها أيه والله أن كل واحد هلل لهذا الموضوع سوف يخجل من نفسهأما هبة فلها كلمة واحدة أنت عمرك ما هتشوفي خير في حياتك وهذا عن تجربة شخص سبقك في عقوق أهله منذ 17 سنة بنفس الطريقة وتركهم بكل غرور والان بعد كل هذة السنين أنتهت تجربته بالفشل الزريع ومات أبوه و أمه وهو بعيد ولم يراهم ليطلب منهم مسامحته ولقد حرمه الله من أطفاله كم حرق قلب أهله عليه سابقا

  10. بسم الله الرحمن الرحيمبصراحة اجمل ما قرأت بخصوص هذا الموضوع المؤلم نفسيا والمثير للغثيان فى تناول الكثيرين له ,عموما لا اتصور بعد كل ما فعلته انها حقا ستلزم الجادة فى الغالب ستكون بداية الانحراف وبالتأكيد سيتلقفها العالمانيين واليساريين ليتخذوها مثل ورمز على اضطهاد المرأة وما الى ذلك .خسارة هبة نجيب

  11. أتفق أو أختلفالموضوع خاص جداً لا يمكن الحكم عليهظروف هبة واهلهاغير ظروف شيماء واهلهاغير ظروف مها واهلهاهبة تعرف تعيش فبلد غير بلدها وكويسشيماء عايزة تعيش حياة مختلفة وجديدةمها بتحب واحد وعايزة تسافرلهغير مي ورانيا واسماء وبنات كتير قوي ليهم ظروفوكل الظروف دي مش واحدةوالناس مختلفين جداومش ممكن نحكم على قضايا زي دي حكم عاميبقى هنظلمبوست مثير

  12. كل كلام الاخت انسانه….صح 100% وانا موافق لها في كل كلامها….واشكر الاخت انسانه على مواضيعها الحساسه اللي تتكلم عنها من وقت لاخر….واسأل الله ان يوفقك لقول الحق في اي وقت ويزيدك علم ومعرفه.

  13. الله ينور عليكعاقلة و الله و فاهمةأنا موضوع قلب المفاهيم و تشويه الصالح أصبح يشغل بالى جدا لأنه يشبه الفخ المزين الذى يوقع الناس فيه نتيجة إعجابهم بالزينة المزيفة التى تكسوه.و موضوع الإنسانية و حقوق الإنسان هناك شق كبير منه مضلل و مدمر مثل هذا المثال الذى ضربتيه فهم بحجة حقوق المرأة يريدون للمرأة أن تعيش بدون حماية حتى يستطيعون النيل منها كيفما شاءوا.الله يبرك لك و ينور بصيرتك

  14. تسلم ايديك بجدانا معاك تماماالمشكلة ان فى ناس بتقدر تحرض بنت على ابوها وساعة الجد مين هيقف معاها؟ايا كانت الاسباب اللى عايزاها ترجع مصرالواحد بيتعامل مع امه وابوه بمنطق انى الحق استمتع بوجودهماتهنى بقربهمربنا سبحانه وتعالى قال( لعن الذين كفروا من بنى اسرائيل على لسان داود وعيسى بن مريم كانوا لا يتناهون عن منكر فعلوه)تحياتى لك ولقدراتك العقلية اللى مش فى النازل ابدا

  15. الدنيا اتقلب حالها هاتي حد هيخاف عليكي زي باباكي ومامتك اتحداكي لو لاقيتي وانا مش متضامنه نهائي

  16. ابادلك نفس الرأي

  17. عزيزتي إنسانهبما أني عايشه خارج مصر طول عمري فأنا حاأقول لك الحكايه من وجهة نظريبناتنا اللي اتولدوا خارج مصر وعاشوا في الغربه غالبا لايجدون عرسانا كثيرات منهن حولى فاتهن قطار الزواج،لأن فرص التعارف قليلة ،كذلك ترفض العائلات تزويج بناتهن من شباب يحملون جنسيات مختلفه عن جنسيتهاأما أن ابوها رافض نزولها للعيش في مصراعتقد أنه أمر منطقي طالما لأنه يخاف عليهالكن من حقها أيضا ان تعيش كأنسان وكائن مستقل يعرف حقوقه وواجباته خاصة وأنها تعدت سن الرشد بسنوات كثيرةأما ليه عايزه ترجع مصر وهي مصر حلوه يعني كما فهمت من بعض العبارات؟؟؟فأقول لك مصر دي احلى بلد في الدنيا برغم كل مافيها من سلبياتولا قيمة لنا بدون مصرالوطن غالي والمتغرب هو أكثر واحد حاسس بألم البعادابنتي المولوده خارج مصر نذهبت الى مصر للدراسه الجامعية ، وتخرجت هذا العام وترفض تماما العودة الى الإمارات،هذا ما جعل والدها يفضل البقاء في مصر معها،وعندما أسألها لماذا تفضل العيش في مصر رغم أن فيها سلبيات كثيرة،خاصة تلك التي تصدر من سلوكيات الناس،وأن الحياه في مصر صعبه فتجيبني مصر فيها حياهتحياتي

  18. السلام عليكمأؤيد ما ذكرتيه وبشدة وانا بالفعل مع الجانب غير المتضامن مع هبه.. وده انا قولته علىاحدى الجروبات على الفيس بوك اللي اتكلمت عن الموضوعالمسألة عائلية بحتة وهذه الفتاة ارتكبت خطأ فادح في عدم تقديرها للأمر والخطأ الأفدح فيمن انساقوا ورائها وايدوها كالقطيع دون فهم للأمر جيدااحنا دايما كده عاوزين جنازة ونشبع فيها لطم..مفيش استقلاقية في الفكر ولا جسارة في اني اقول رأيي بحرية فكرية ولست اقصد حرية التعبير ذاتها——–" ليه كل حاجة نلزقها فى أنثى ضايع حقوقها فقط لكونها أنثى؟؟؟ … كأننا على راسنا بطحة واى حد يجي جمب اى أنثى تبقى مصيبة سودا على راسه"عندك حق جدافي الكلمتين دولوالله البنت دي حسستني انها معتقله فيجوانتناموا..اه والله بجد حسيت بكدهحسبنا الله ونعم الوكيلوربنا يهدي الجميع ورمضان كريم كل سنة وحضرتك طيبةفي حفظ الله

  19. متفق معاكي تمام

  20. صدقتِ والله .. أصلا الفيس بوك بيستفزني فيه ان كل اللي عنده مشكله مدايقاه ولو شخصية يروح ينشر ويشهر وبيلاقي ناس تتضامن وتعمل الموضوع كأنه قضية أمن قومي دون النظر إلى وجهة نظر الشخص الآخر و بيتعرض الموضوع من وجهة نظر اللي عارضه وبس ويتعمل مشكله ..أنا شايفه دي هيافه وجبن اننا نواجه مشاكلنا الشخصيه لوحدنا وبنروح نشهر علشان نلاقي ناس تقف وتتضامن وتحل مشاكلنا بالنيابه عننا حتى لو كنا غلط هنلاقي ناس تسقفلنا وتقول اننا صح في وسط ملايين من متابعي النت وإنا لله وإنا إليه راجعون

  21. السلام عليكم ورحمة الله وبركاتهاختي إنسانهأنت فعلا إنسانه بنبل عواطفكالإنساة البارة بوالديها هيك بكون تفكيرهابحيي فيك معارضتك وبعد أنا معارضة وغير متضامنةيعني الاب بتعب وبشقى على ترباية بنتو ولما تكبر بتتنمرد على إمها وأبوهاهالشي مابرضي لا الله ولارسولهفيض تقديري لفكرك الواعي

  22. كل رمضان و انت بخيرتحياتى

  23. رأيي زيك جداوالحقيقة إني مش قدرت أتابع قصتها كتيرمجرد إني قرأتها وعرفتها بس لقيتها بعدها مش جديرة بالمتابعة. مش عارفة إذا كان دة صح ولا غلط بس دة كان رد فعليو فعلا شفتها حاجة بسيطة عائلية، ومش محتاجة تكبر بالطريقة الغريبة ديموضوع حرية المرأة وحقوقها دة شايفاه زاد عن حده جدا جدابحب رأيك جدا بجد وبفرح لما أقرألك أي حاجة جديدةناضجة و إنسانة أويييدمت بود

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: