يعني ايه الحاجة زهرة؟


يعني ايه الحاجة زهرة؟ يعني تبقى جميلة وفِرعة لدرجة إن كل اللي يشوفك يحبك فوراً ويتهبل من جمالك يابنت المحظوظة .. من الآخر تبقى سوبر سوبريم وومن والأجر على الله

يعني ايه الحاجة زهرة؟ يعني تتجوزي مرة وإتنين وتلاتة وعشرين لو أمكن – هو الجواز حوروم؟ – فما إن تحصل أي مصيبة لزوجك حتى يأتي لك زوج جديد على الفور

يعني ايه الحاجة زهرة؟ يعني يتلهف الرجال على الزواج منك لهفة غير طبيعية .. تذكرني بلهفة الممسوك عليه ذلة

يعني ايه الحاجة زهرة؟ يعني كل ما جوزك يتبخر – يتسجن بقى يموت تجيله مصيبة تاخده مش مشكلتنا دلوقتي – يجيلك غيره هوا من غير ما يفكر ولو لثانية إنك ممكن تكوني نحس مثلا

يعني ايه الحاجة زهرة؟ يعني جوزك يموت محروق والعياذ بالله – ما انتى نحس بقى – ويرجع لك تاني بعد كام حلقة صاغ سليم من غير خدشة واحدة ، كل الحكاية إنه فاقد الذاكرة بس .. بسيطة نبعت نشتري له واحدة جديدة

يعني ايه الحاجة زهرة؟ يعني كل ما تتجوزي راجل جديد يعدي مشهدين وتضحكي فى خباثة مصطنعة وتقولي له ( أنا حامل ) .. كلما سمعت هذه الكلمة على لسان الحاجة زهرة شعرت إننا فى أزهى عصور الخصوبة

يعني ايه الحاجة زهرة؟ يعني تسع شهور الحمل يعدوا هوا ، وهوب تدخلي المستشفى هوب تزلطي العيل من دول ، هوب يختفي العيل عن الشاشة فى محاولة واضحة وصريحة لتهميش الدور الدرامي المحوري للرضيع (المزلوط لتوه) .. ولا أدري كيف تسكت أم الرضيع الموهوب الحقيقية على تهميش دور رضيعها الدرامي بهذا الشكل؟

يعني ايه الحاجة زهرة؟ يعني تزلطي العيل من هنا وترجعي رفيعة وأمورة وحلوة وغندورة تاني مشهد على طول ، ويتكرر هذا النهج الميتافزيقي مع كل حمل وكل ولادة ، وبالرغم من إن الزوجة الطبيعية ” تفيص تفييصاً تاماً ” مع ولادة العيل الثالث إلا إن المخرج عايز كدة .. حد له شوق فى حاجة؟

يعني ايه الحاجة زهرة؟ يعني يبقى عندك 3 أولاد فى سن حديثة ولا يطرف لك رمش عليهم ولا ترضعي ده ولا تسكتي فى ده ولا تشقري على ده ، ناهيكي بقى عن البامبرز والتكريع والتهشيك والذى منه ، أولاد الحاجة زهرة إنفيزيبول أول ذا تيم


يعني ايه الحاجة زهرة؟ يعني تفضلي طول الوقت مصيفة ولابسة – أو مش لابسة – صيفي ، رغم إن كل عيل من العيال التلاتة بياخد له كدة حسبة 9 شهور عقبال مايشرف ، يعني يمر عليه أمطار ورعود ورياح وبرد وحر وخريف وربيع .. لكن يبدو إن الحاجة زهرة متمسكة بنظرية العجل فى بطن أمه


يعني ايه الحاجة زهرة؟ يعني بالصلاة ع النبي كدة يبقى عندك خمس أزواج حتة واحدة ، مع إن كل تترات المسلسل تؤكد إنهم أربعة بس .. لكن نقول ايه؟ ماهو معاها فى نفس الموسم مسلسل عايزة أتجوز ، يعني حقها تخمس فى وشنا يا جماعة برضه .. حقها ولا مش حقها؟ .. حقها يا أبو كمال ، حقها ياخويا

25 Responses to “يعني ايه الحاجة زهرة؟”

  1. هاهاهاها ..مفكرتش ابداً اشوف المسلسل لأن توقعاتى مخرجتش أبداً عن اللى انتى كتبتيه ….الحمد لله اللى نجانى ..تستاهلوا انكم بتتفرجوا ع الحاجات دى :))حلو البوست كالعادة يا سمسم

  2. هههههههههههههههههههههههههههههههههههههههههههههههههههفظيغةةةةةةةةةةةة بجدهلكتيني من الضوحكهو انا حقيقي ماشوفتش المسلسلولا ناوية يعني لاني عقبال عندكم جميعا خفيت من فيرس المسلسلات من 3 سنين كدهبس اخدت عنه فكرة وافيه منكهههههههههههههههههههههههولتحيا الست زهرة ويموت ازواجها وولادهاههههههههههههههههههههه

  3. عندك حق بجد وفعلا أنا مستغربة من كمية الرجالة المعجبين بيها بالشكل العبيط دهولا العيال اللى بتختفى ولا تعرف عنهم حاجة جامد بجد البوست ده

  4. هاهاهيا جامد انتموضوع الخمسة دا اكيد له اصل واساسامال ايهاصبرى انتى بس لاخر المسلسل:))

  5. هاهاها جميل!! حبيت

  6. احترم الانسان المبدع

  7. Great PostKeep goingwaiting 4 the next one🙂

  8. كانت تسلف عريس واحد منهم للي بتموت كل يوم وعايزة تتجوز دي

  9. تسلمي بجد بجد جبتي اللي في نفسيمسلسل يفقع

  10. واوهو طلع الموضوع كده؟طيب الحمد لله إني مش متابع حاجةصحتي ما بقتش تستحمل الحاجات اللي تجيب الضغط دي:-)

  11. ادينا مع الكداب لحد بابا البيتلما نشوف اخر الحاجه زهرة واجوازها ايهتحليلاتك مطقيه … بس اكيد المعنى فى بطن الشاعر… ولا ايه؟؟؟؟

  12. يعني ايه تبقي الحاجة زهرةيعني جوزك يطلع طلاقك منه باطل وانتي لسه على ذمته ومع ذلك سايبك تجربي رجالة تانين وبيقول عاوزك تعرفي غلطك لوحدك وترجعي بمزاجك ولا بيطلقك ولا بتعتبري طول الحلقات زانيةيعني ايه تبقي الحاجة زهرةيعني المسلسل يتعرض على الأزهر فيقول عادي وكول وأول سايز وماشي وممكن يتصور ويكون الأعلى مبيعا وتوزيعا وأعلاناتا في الوطن العربي الشريف ابن الشريفيعني إيه تبقي الحاجة زهرةتلطعي على ايد وشم العزيمةوعلى الإيد التانية وشم الإيمانوعلى صباعك وشم رقم سبعة علشان ده الحظاظة بتاعتكولما يسألك عمرو اديب تقولي دول هم اللي ظاهرين وترقعي ضحكة ذات شجون ومعاني تحلل كل الجوازات بصراحة وتفهمنا ليه خمستي في وشناكل سنة وانتي طيبة

  13. ايه يا جماعه النفسنه دى الست حلوه واموره واثبتت بالشكل العملى ان ما فيش مشكله عنوسه عرفتوا بقى ليه هند صبرى مش لاقيه عريس لان زهره خدتهم كلهمانا خايفه بعد رمضان يقولوا ان المسلسل نجح نجاح غير عادى وهيعملوا جزء تانى فتحسبا لاى ظروف كل واحد يحافظ على جوزه ليروحوا يتجوزوه وبعدين نعمل ايه فى هند صبرى هنجيب لها عرسان منين

  14. ههههههههعندك حق والله كل الحاجات اللى مجننانى انتى قولتيها ياياسمين وخصوصا كل ماتتجوز واحد هوووووووب تجيب منه عيل هههههههههوالاكاده ولا بيبان عليها وبعدين الزوج الخامس ده ……فزوره قالوا يستغلوا لبس وماكياج ورقص الحاجه ويبقى مسلسل وفزوره فى آن واحد هههههههههوالجايزه قميص وروب من فضله خير الحاجه

  15. يعني ايه الحاجة زهرة؟ بقى هو فى إيه ؟ سيبك من التفاصيل دى المهم هدف العمل اللى هو بقى؟

  16. ههههههههههههههههههههههههههههههههههههههههههههههههههههههههههههههههههههههههههههههههههههههههههههههههيخرب بيت شيطانك خلتينى افطس من الضحك على البوست انت تحفهاولا اعذرينى على تقصيرى معاكى بس ان شاء الله مش هسيب بوست الا لما اجى واقراه كل سنه وانت طيبة

  17. تحفة بوست رائع جدا تسلم ايديك يا انسانة وكمان دكتورة ستيتة عندها حق تكملة رائعة جدا خصوصا موضوع الازهر ده مش عارفة موافقين على المسلسل ازاىده مسلسل مستفز جدا

  18. حلوه قوي قوي

  19. يا جماعة الزوج الخامس دا هايعملوا عليه سحب في اخر رمضان و اللي هايكسب يتجوزها و يعيش في خيرها .ْْالحق و اتصل ب 0900900900900900

  20. هههههههههههههههههههههههههههههههههههههههههههههه موتيني من الضحك بجدعادي المخرج عاوز كدااا

  21. النفسنه والحقد بقى على زهره هههههههه

  22. بوست هايل :))بس نسيتى تقولى إن الحاجة زهرة يعنى حسن يوسف يرجع للتمثيل بعد "إمام الدعاه" بقضيتك الاجتماعية الخطيرة اللى مفيش أهم ولا أبرز منها فى المجتمع

  23. رمضان كريم🙂

  24. السلام عليكممتابعة مدونتك من زمان ، بس أول مرة أرد فيها : )أكتر حاجة خنقتني في السلسل دا هو الأطفال المهمشين دول اللي ملهمش صوت ، دا غير إن المسلسل كله يفقع !صدقتي !ربنا يكرمك يارب يا إنسانة🙂

  25. انتى بلوى :Dفعلا زهرة بتنقطنى !"الكلمـة نـور .. وبعـض الكلمـات قبـور"باحب القصيدة دى اوى :)مدونتك جميلةهاجى هنا كتير .. ان شاء اللهكل سنة وانتى طيبة:)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: